Sawrkar sum tel loin Serchhipin KṬP General Conference 2020 dawn tum

Vawiin (20.11.2019) khan Serchhip Kawnpui Kohhran Hall-ah KṬP General Conference 2020 Organising Committee te an ṭhukhawm a, General Conference thlenna tur atana ruahmanna hrang hranga hmalak tawhna te report ngaihthlak a ni.

Vawiina Organising Committee hian General Conference atana Budget a lo siam tawh chungchang a thlir nawn a. General Conference thlenna tur hian budget cheng nuaih 70 siam a ni a, Kohhran aṭanga thawhkhawm hi cheng nuai 50 a ni a, hemi bakah hian cheng nuai 20 hi sawrkar lam aṭanga hmuh beisei a ni bawk a. Cheng nuai 20 hi sawrkar lam aṭanga hmu mai thei tura inngaih a nih laiin, hmuh tumna lamah remchan lohna a awm thu report dawn leh a nih tak avangin vawiina Organising Committee ṭhukhawm chuan KṬP General Conference dawnna turah hian, Sawrkar lam aṭangin sum leh pai lamah beisei neih tawh loh law law mai ni se, an ti a. Budget cheng nuai 70 an lo siam tawh pawh cheng nuai 60-ah tla thlain, cheng nuai 10 hi Conference thleng tur Pastor Bial hrang hrangte'n insem leh mai ni se, an ti bawk. General Conference Organising Committee-a Kohhran aiawh ṭhukhawmte chuan sawrkar sum beisei loa inkhawmpui thlen hi lungrual takin an pawm.

Cheng nuai 10 hi hetiang hian additional budget an siam -

  1. Serchhip Pastor Bial - ₹ Nuai 4,
  2. New Serchhip Pastor Bial - ₹ Nuai 2.5,
  3. Serchhip Vengchung Pastor Bial - ₹ Nuai 3.5.


Ogranising Committee-te chuan KṬP General Conference an dawn turah Kohhran mipuite chu mahni phak ang tawka theihtawp chhuah ṭheuh turin a ngen a, sub-committee-te pawh Budget tihhniam a nih leh tak avang hian an sum hmanna ruahmante uluk taka siam a, remchem taka sum hmang turin a chah bawk. Vawiina Organising Committee ṭhukhawm hian KṬP General Conference 2020 Serchhipin a dawn tur denchhenin, Serchhipa mobile service provider hrang hrangte an service tiṭha lehzual tura ngen ni se, tih te, District chhunga Ui leh ar khuahkhirh turin District Magistrate ngen ni se, tih te, Chhiahtlang to Lamchhip kawng la siam zawh loh chu siam zawh thuai a nih theihna'n sawrkarah ngen ni se, an ti bawk. Tin, Leisekawt field-a Pavillion awm lai chu ṭhiah a nih theihna'n UD&PA ah thlen ni se, an ti bawk.

KṬP General Conference Serchhipin 2020-a a dawn turah hian Organising Committee chuan Sub-Committee peng hrang hrang 9 a siam a, November 26 - December 16 chhung hian Kohhran hnatlangin pandal sak tum a ni a, November 26 hian Pandal sak bul ṭanna Conference thleng tur Pastor Bial 3-te'n an nei ang a, a bak hi chu Kohhran mipuite a inchhawkin hnatlang neih a ni ang.

Comments