Pandal sak hnatlangah mi thahnemngai te thawk zel

KTP General Conference Pandal sak hna chu chhunzawm mek zel a ni a, dawngtu bial lampang pawh an hnatlang zing tawhin hnatlang te pawh an hau tawh hle. Organising lam ten Bial leh Branch KTP te bakah Pavalai te hnatlang turin a inchhawkin an ruat thin a. Hnatlang hi duh anga an tam thin loh avangin tunah chuan hnatlang tur bik inruat a awm hran tawh lova, hnathawh tur tul zual bik te chu a thawk tur awm mi Organising lam ten an insawm a, hlawhfa te pawh lak a ni thin.

Thalai lam pawhin hnatlang an ko deuhreng a, chhunlamah thalai hnatlang an awm mumal ngailoh avangin zan lamah hnatlang hi koh a ni tlangpui a. Organising lam ten a huhova hnatlang an ko hranpa tawhlo a, chutih laiin a dawngtu thalai lam ten thahnem an ngai hle a, branch thenkhat te chuan Thawhtan zan inkhawm aiah te an hnatlang a, zan awl dangah te pawh hnathawh tur insiam chawpin hnatlang ko branch an awm thin khawp. Heti chung hian thawh ngai, chul mam lai, chinfel ngai a la awm nual mai.

Vawiin(14.02.2020) Ningani khan Tv Hmangaihsanga leh Tv Francis-a Serchhip Kawnpui Branch te chuan Pandal sak mek hna tam zia leh hmanhmawhthlak tawh zia hriain tumah sawm ni hauh lovin pandal thutthleng siamremin an mimal thahnemngaihnain an hnatlang a, nilengin rim takin an thawk. Hetianga sawm leh ngen hranpa pawh awm lova mimal thahnem ngaihna avanga an rawn hnatlang hi an chungah Organising Committee te pawh an lawm hle a ni. 

Comments